सरसों फुलाई गइनी मटर
गदराई गइनी
हरे – हरे पतवा से खेतिया
तोपाई गइनी
अलुआ खनाये लागल उखुड़ी
पेराए लागल
सनई के देंहिया में
घुँघरू टंगाये लागल
क्यारी- क्यारी खेत
बारी चारो ओर हरियाली
एक हमही सूखल जात
बाटी मोर सजनवा
मकर संकरान्ति कै बीति
गै नहनवाँ
दाना भेली खिचड़ी कै
बीतल मौसमवाँ
चनवो में नील फूल तीसी
चोनराइल
बथुवा भी खेतवा में गईल
उधिराइल
काव - काव कही हम अउर
का बताई
धनिया के पतिया
खोंटाले मोर सजनवाँ
तोंहके अगोरि गयल
साग रिसीयाई
सकपहिता रिसी में
गयल बसियाई
तोंहके अगोरि के
रजइयो बुढ़ाइल
दुअरे कै गेंदा फूल
गयल मुरझाइल
जाड़ा जवानी कै चानी
मौसमवां
झख मारि बीतल जात बाटै
मोर सजनवां
घमवा चहकि उठे अमवा
बउरि उठे
महकत फुलवन पे भंवरा
बहकि उठे
होली नियराई गइल
सियरो रंगाई गइल
बुढ़वन के चेहरन पे
होली उधिराई गइल
फाग कै रगिया त कनवा
सुनाई गइल
तू कहिया गइबा मोरे
संग मोर सजनवाँ
जेठ - जेठनियों कै
मन बउराइल
छोटे-छोटे लड़िकन कै
मन उधिराइल
देवरू त लागत हउवें
पूरा पगलाइल
ससुरो कै मन लागत हउवै
ललचाइल
अइसे में हमसे रहाइस
न होला
आवा अपने रंग में
रंगावा मोर सजनवाँ
बाटी गोहरावत चलि
आवा मोर सजनवाँ
पवन तिवारी
संवाद – ७७१८०८०९७८
कोई टिप्पणी नहीं:
एक टिप्पणी भेजें